Matthew 25

Amp Wendᵾp 10 Kat Nga Ik Ek Ropa Nitim

1Ui ei kᵾn, muⱡ kona tᵾpa mumuk rui uⱡ ei, amp wendᵾp 10 kᵾⱡ mel kapⱡa. Amp wendᵾp kᵾⱡ, rumbuldi en enim nga lam kiya mbᵾ kandᵾk mek, amp tᵾmba wu ei, nombuⱡa rᵾk ting tila kandᵾp timin nᵾk purung. 2Amp wendᵾp 10 kᵾⱡ nga, amp 5 kat rundi kᵾⱡ, wote amp 5 kat mong rui kᵾⱡ. 3Amp rundi kᵾⱡ lam kiya kandᵾk mek purung. Wote, lam kiya norum kopung ei nga, mat pendᵾk kulk mek pi naprᵾng. 4Wote, amp mong rui ni kᵾⱡ, lam kiya norum kopung ei nga, mat pendᵾk kulk mek purung. 5Amp tᵾmba wu ni, nondpa ui nawᵾⱡnga, amp wendᵾp ni kᵾⱡ, nokundᵾk molk, kui nᵾk ur petᵾng.

6“Ni kᵾn, ou rumbuldi wi ti omba, ‘Amp tᵾmba wu ei, onum o! Nombuⱡa ila ok, kandᵾk teing wᵾiyo!’ nitim.

7“Wote, amp wendᵾp 10 ni kᵾⱡ, ur petᵾng ei mel rut nᵾk, lam kiya kandᵾk mondrung nimbᵾ, mek ping ei nga tᵾk kun etᵾng. 8Ei kᵾn, amp rundi ni kᵾⱡ ndi, mong rui ni kᵾⱡ kundᵾk nᵾk mel, ‘Angmᵾn kᵾⱡ, tᵾn nga lam kiya kᵾⱡ kumᵾnᵾm ei ka! Enim nga kopung mat tᵾn oi nduk ngᵾng ka!’ nᵾtᵾng.

9“Amp wendᵾp mong rui ni kᵾⱡ ndi, ‘Angmᵾn kᵾⱡ, enim kopung mat oi ndupᵾn ngᵾmᵾn ndam, enim kep, tᵾn kep pᵾkᵾ, kopung ei nga kapⱡa iti natᵾmba. Ei kᵾn, enim mel rarᵾp manga tila puk, kopung mat rarᵾp rok teing pᵾi,’ nᵾtᵾng.

10“Amp rundi ni kᵾⱡ, kokila kopung rarᵾp ruing puⱡina mel, amp tᵾmba wu ni, omba ekit urᵾm. Amp wendᵾp mong rui kᵾⱡ, tᵾk kun etᵾk morung ni mel, amp tᵾmba wu ni nga kng rᵾng raⱡ koindᵾk tᵾk, kun etᵾk morung manga nila kunda murᵾk puⱡnga, manga kumba ni angᵾndpa gi ndurum.

11“Wote, amp wendᵾp rundi ni kᵾⱡ, akil tek ok nᵾk mel, ‘Nuim ei! Nuim ei! Tᵾn kumba tana, murᵾk imᵾn ka!’ nᵾtᵾng.

12“Ni kᵾn, amp tᵾmba wu ei ndi, ik punt ropa nimba mel, ‘Na ik kupa ei nᵾnt. Enim amp namin kᵾⱡ, enim na pili napᵾt ei ka!’” nitim.

13Jisas ndi, ik kᵾⱡ nimba pora ndumba, etpa ei mel nitim, “Na yant uimp ei, rumbᵾⱡ ila muna, rᵾnggilmᵾ muna, ant mong nant tila uimp. Ei nambuⱡ emel, enim pili nᵾpiling ei nga, tᵾk mendᵾk muⱡᵾi!” nitim.

Kongun Wu Raldika Kat Nga Ik Ek

14“Wote, ui ei kᵾn, Got nga muⱡ ila wamp tᵾpa mumuk romba uⱡ ei, ya ei mel, wu ti kona ruⱡ tila mba pilpa, elim nga kongun wu mbᵾ tᵾpa, elim nga kng mel tetᵾm mbᵾ, elpa elpa rᵾp etᵾk muⱡᵾi nitim. 15Wu mbᵾ nga ronduⱡ ei mel ku pilpa, ku moni kᵾmp tᵾpa, elpa elpa ngurum. Wu ti, ku moni K5000 ngumba, wu ti ku moni K2000 ngumba, wu ti ku moni K1000 ngurum. Ngumba pendpa, elim kona roⱡ nila purum. 16Ku moni K5000 tᵾtᵾm wu ni ndi, mepa int mba kongun etpa, ropa oⱡa mana etpa, ku K5000 pendpa yant tᵾtᵾm. 17Wote, ku moni K2000 tᵾtᵾm wu ni ndi, ei mel ku etpa, moni K2000 oⱡa ndupa pendpa tᵾtᵾm. 18Wote, ku moni K1000 tᵾtᵾm kongun wu ni ndi, elim nga nuim ei nga ku moni kᵾⱡ mepa mba, mᵾi ila kut akpa oⱡᵾm ropa pinditim.

19“Wote, ui mat ruⱡ etpa kongun wu kᵾⱡ nga, wu nuim ei yant omba, elim nga ku ngur nimbᵾ, etᵾk tek mormin mel kᵾnimp nitim. 20Ku moni K5000 tᵾtᵾm wu ni ndi, yant omba kont nga K5000 pendpa ngurum. Ngumba nimba mel, ‘Nuim ye! Nim na ku K5000 ngurun ni, wote na ndi, rop oⱡa mana etᵾp mep andᵾp, K5000 kᵾⱡ pendᵾp ngont,’ nitim.

21“Wote, wu nuim ni ndi, punt ropa nimba mel, ‘Pᵾp nᵾn, nim kongun wu koip pi ye! Nim ku moni onunga kuraⱡ ila, ronduⱡ pukᵾn etkᵾn ou ndun kant ei kᵾn, na nga ku moni ou ndupa tetᵾm mbᵾ rᵾp indᵾn. Na nim nga nuim ei, akup kai pᵾnt ei kᵾn, nim murᵾk wana ambᵾⱡᵾp paⱡᵾp muⱡᵾmbil ui!’ nitim.

22“Ei kᵾn, ku K2000 tᵾtᵾm wu ni ndi, omba nimba mel, ‘Nuim ei! Nim na ku K2000 ngurun ni, wote na ndi, kongun etᵾp mep andᵾp, K2000 kᵾⱡ ya pendᵾp ngont,’ nitim.

23“Wote, wu nuim ni ndi, punt ropa nimba mel, ‘Pup nᵾn, nim wu koip pi ye! Nim ku moni onunga kuraⱡ ila, ronduⱡ pukᵾn, etkᵾn ou ndun in kant ei kᵾn, na nga ku moni ou ndupa etpa tetᵾm mbᵾ rᵾp itᵾn. Na nim nga Nuim ei, akup kai pᵾnt ei kᵾn, nim murᵾk wana, ambᵾⱡᵾp paⱡᵾp muⱡᵾmbil ui!’ nitim.

24“Wote, akil tepa ku moni K1000 tᵾtᵾm wu ni ndi, omba nimba mel, ‘Nuim ei, nim wu ik pili napilikᵾn, rᵾng rᵾⱡi nakᵾrᵾn pana ila kun polkᵾn tᵾkᵾn, rᵾng mong mundi nᵾmᵾndrᵾn mbᵾ, kun mekᵾn etᵾn. 25Ni nga, na pilip mundmong etᵾp, nim nga ku moni ngurun ni kᵾⱡ, mep mbo mᵾi ila mo rop pindᵾt. Ei mel, akup nim nga ku moni kᵾⱡ, ninim mep omp ngont,’ nitim.

26“Wote, wu nuim ni ndi, nimba int ndupa, ‘Nim kongun wu kit, enᵾmp mundi ye! Na rᵾng rᵾⱡi narᵾr pana ila kun poⱡᵾp tᵾp, wote rᵾng mong mundi namᵾndᵾr mbᵾ, kun mep et ni kᵾn pitim ndam, wote na nga ku moni kᵾⱡ mek pukᵾn, ku manga ila tiyana, akup nanim yant unt ei kᵾn, ku moni kat mbᵾⱡ ila tindangina, pendᵾp tilmba,’ nitim.

28“Wote, wu nuim ei ndi, kongun wu kat kundpa nimba mel, ‘Ku moni kᵾⱡ tᵾk wu ti, moni K10000 ngum wu ni ngᵾi! 29Nambuⱡ emel, wamp nam ti ndi, mel ou ndupa tepa moⱡum ila mbᵾⱡ ila mel ou ndupa ngangga, ama minal tᵾmba. Wote wamp nam ti, mel onunga etpa tepa moⱡum ni kᵾⱡ, yant tᵾpa mel ou ndupa tepa moⱡum wamp ni ngumba. Wote, wamp nam ti, mel onunga etpa tepa moⱡum kᵾⱡ, kelpa ekit tᵾmba. 30Wote, ya kongun wu enᵾmp mundi ei, kona rumbᵾⱡ mul ila rok pena ndᵾi, kona ila ka etpa, gu konggilpa, gᵾkᵾr tᵾpa moⱡmba!’ nitim.

Muⱡᵾl Wu Kupa Ei Ndi, Wamp Mbᵾ Pora Kᵾmp Tᵾmba

31“Wote, Muⱡᵾl Wu Kupa ei, Wu Nuim Mumuk moⱡpa om ei kᵾn, muⱡ ila anggelo mbᵾ kunda uing. Wote, ui ei kᵾn, elim king rᵾpndi pol ila moⱡmba. 32Wote, ei kᵾn, mana mᵾi kona wamp mbᵾ pora, elim nga kuimp keta ila tᵾk tenda iting. Ei kᵾn, wamp mbᵾ, kng sipsip rᵾp wu ti ndi, kng sipsip mbᵾ, tᵾpa tila mondpa, meme mbᵾ, tᵾpa tila mondpa etᵾm ni mel etmba. 33Elim ndi, kng sipsip mbᵾ tᵾpa, elim nga ki mbo orunga mondpa, wote kng meme mbᵾ tᵾpa, ki rar orunga mondᵾmba.

34“Wote, Wu Nuim Mumuk ei ndi, elim nga ki mbo orunga moⱡᵾng wamp mbᵾ kundpa nimba mel, ‘Enim na nga wuta ndi, memp pinditim wamp mbᵾ, enim nga tᵾpa mumuk rui kona ei muⱡ mᵾi raⱡ wengᵾndupa itim ei kᵾn, koⱡ nondpa tᵾndᵾtᵾm kona ila ok, muⱡᵾi nimba. 35Nambuⱡ emel, na kun ndi, koⱡmba kandᵾk, rᵾng ngurung. Nu waka ndi, koⱡmba kandᵾk, nu kolk ngorung. Manga tᵾma oⱡᵾmba, rawe etᵾk tᵾtᵾng, giyu gou andᵾⱡᵾmba kandᵾk, wal pᵾki na mat tᵾk randrᵾng. Na kui roⱡnga pilmba ok, kuimp keta minal etᵾng, kan manga ila pilmba ok kandrung,’ nitim.

37“Wote, wamp kun kai mbᵾ ndi, nᵾk int nduk, ‘Nuim ei, nim ni ui nant kᵾn, kun ndi koⱡnga kandpᵾn, rᵾng ngurmin? Muna nant kᵾn, nu waka koⱡnga kandpᵾn, nu kuⱡᵾp ngurmin? Muna nant kᵾn manga tᵾma oⱡina kandpᵾn, rawe etᵾp tᵾtmᵾn? Muna nant kᵾn, giyu gou andilnga kandpᵾn, wal pᵾki mat tᵾp rundᵾrmᵾn? Nim ni nant kᵾn, kui rᵾrᵾm, muna kan manga ila pelinga kᵾn, omp kᵾndᵾrmᵾn ei nga nᵾn?’ ning.

40“Ei kᵾn, Wu Nuim Mumuk ei ndi, punt ropa nimba mel, ‘Enim ik kupa ei, kundᵾp nᵾnt. Ya nᵾnt uⱡ mbᵾ mel wamp mbi mul nᵾmbil, na nga ᵾngᵾnᵾl mbᵾ kᵾn, etᵾng uⱡ nimbᵾ, na kᵾn etᵾng!’

41“Wote, ki rar orunga moⱡᵾng wamp mbᵾ kundpa nimba mel, ‘Enim Got nga mbun kit ei ndi, nomba wamp mbᵾ, na nga kuimp keta ila kun etᵾk muⱡᵾi! Enim Seitan kᵾn, elim nga anggelo mbᵾ kᵾn, ndip nomba mint pi kona tᵾpa, kun endpa tᵾtᵾm kona ila pᵾi! 42Na kun ndi, kur ei kandᵾk, wote rᵾng ngui nganggᵾrᵾng. Na nu waka kuⱡᵾp mur ei kᵾn, wote nu kolk ngui nganggᵾrᵾng. Na manga tᵾma ur ei kᵾn, wote rawe etᵾk ti natᵾtᵾng. Na giyu gou ᵾndᵾr ei kandᵾk, wote wal pᵾki na ti, tᵾk rundi nandrᵾng. Na kui mang ila, muna kan mang ila pit ei kᵾn ok, wote kᵾni nakᵾndrᵾng,’ nitim.

44“Wote, wamp mbᵾ ndi, nᵾk int nduk mel, ‘Nuim ye! Nim ni nant kᵾn, kun ndi kolkᵾn, nu waka kulkᵾn, muna giyu gou molkᵾn, kui manga ila kep, kan manga ila kep, pekᵾn itin mbᵾ kᵾn, tᵾp rᵾpndi nᵾpᵾndᵾrmᵾn,’ ning.

45“Wote, Wu Nuim Mumuk ei ndi, punt ropa nimba mel, ‘Enim ik kupa ei, kundᵾp nᵾnt. Ya nᵾnt uⱡ mbᵾ mel, wamp mbi mul nᵾmbil mbᵾ kᵾn, etᵾng uⱡ nimbᵾ, na kᵾn etᵾng,’ nitim.

46“Ei kᵾn, wamp mbᵾ tᵾpa ndip kona ila mundᵾmba, wote wamp kun kai mbᵾ tᵾpa uⱡ nga kᵾnt nga kont uⱡ ei ngumba,” nitim.